... كُنا ----> ( تلاتة ) .... عامية ارزية

(1)

كُنا تلاتة
كُنا تلاتة .. تلاتة اصحاب
أجمل صُحبة في نفس الحي
كُنا الألفة .. كُنا النخوة
كُنا جيران مالناش زي
:
كُنا تلاتة
كُنا تلاتة ..تلاتة اصحاب
كان الأول
كان الأول لو يتألم
يبكي التاني
يجي التالت يصرخ آي
:
كانت الدنيا
كانت الدنيا حلوة ألاجة ( جميلة )
فجأة انقلبت هيلا هيلا هوب
كنا تلاتة
وواحد منا حَب يا سيدنا
قام فركشنا وتاه في الحب
لف ودار
حب .. اختار
أجمل واحدة مـ الحلوين
كُنا تلاتة
وبعد ما حب بقينا اتنين
نبقى تلاتة نبقى اتنين
المشكلة
البنت الحلوة
قلبها مال لواحد بس
واحد بس مـ الاثنين
:
( يتبع )

(2)

البنت الحلوة
قلبها مال
لواحد بس مـ الاثنين
:
حاجة تِحَير
أدي أولنا
عاش الوهم ايام وسنين
خُفنا نقولُه .. نِجرح قلبُه
ويعيش عُمرُه عذاب في عذاب
خُفنا نقوله .. ما يصدقنا
ويطلعنا
واحد غيار والتاني كداب
قُولنا نِسيبُه .. يمشي نَصِيبُه
هو وحظُه
إن كان ابيض ولا هِبَاب
:
نرجع تاني للامورة
الأمورة حانة لمين
قُولنا لواحد
واحد بس مـ الاثنين
الأمورة
الامورة بنت جميلة
خفة وذوق وجمال جذاب
الأمورة
مُهرة أصيلة
ليلة ورا ليلة
الخُطاب لازقين عالباب
:
وكُنا تلاتة
كُنا تلاتة تلاتة اصحاب
راح الأول
:
( يتبع )

(3)

راح الأول
آخر خطوة وِقَدِم خطوة
راح الأول من غير صُحبة
قابل ابوها بغرض الخُطبة
صد ورد .. وضحك وجد
بعد يومين .. جالو الرد
رد يا ساتر
كدة من الاخر قالو رافضين
وَسَط عمو .. وحايل خالو
راحو وقالو وقالو وقالو
والله إن قالو سنة واتنين
الأمورة
عينها يا عمو وعينها يا خالو
غامزة لواحد
واحد بس واحنا اتنين
:
أنا عن نفسي
الأمورة بالنسبة لي
كانت حلم .. حلم حياتي
كُنت بشوفها
وردة جميلة ونفسي اقطقها
وكل ما اقرب منها واخطي
خوف يمنعني أنطق حبي
هي
هي اميرة
أميرة يا ناس وأنا على قدي
لاجل اصحابي بحب في سري
ماشي بغطي عاللي فـ صدري
هي أميرة
وأنا عاشق وفـ قلبي كلام
خوفي
خوفي لَيجرح واحد فيهم لو ينقال
:
أما تالتنا
:
يتبع

(4)

أما تالتنا
صاحب ميسور الحال
أحواله .. عال .. العال
رَبَك
من اوسع ابوابُه إدالُه
شاف البنت .. شغلت بالُه
متجوز
متجوز بَدل المرة تلاتة
في عزه وِمَالُه
محروم
إنه يشوف في الدنيا ضفر عيالُه
:
قال الرابعة
قال الرابعة الأمورة
دي للخِلفة .. لعيال يورثو مالُه
:
راح
راح زغلل عين الأم
بقماشة وغوشتين
والأب
بِشقة ما هو عنده ما شالله
أرض وفيلا .. وعمارتين
:
القمورة قالت
قالت ايه
؟
(يتبع )

متابعون لك أيها الجميل ...

هل سننتظر طويلا


مودتي

(5)

الأمورة قالت إيه
:
قالت لاءة
:
لا المال ها يزغلل قلبي
ولا تالت ها يميل عقلي
:
لاءة ولاءة
أنا لحم ودم .. ومشاعر
والقلب مفهوش غير شاعر
:
يا حبيبتي
يهديكِ يرضيكِ يعطيِك العافية
شاعر إيه .... بلا قافية
الشاعر
إيه ها ينوبك منه
غير قافية وحروف دافية
:
التالت
التاجر يا جماله
ها يهنيِك بقدرِة ماله
التالت
جاي وشاري وعايزك حافية
:
سيبك
التالت المتريش هو نصيبك
يسعد حظِك سنة واتنين
وتكحي له الخلفة قوام
باتعة وسيد وحسين
:
الأمورة
عيني عليها
:
( يتبع )

(6)

عيني عليها
:
الدمع احزان في عنيها
التاجر
التاجر .. تاجر بيها
باعها
بدل المرة مليون مرة
باعها
للخنقة .. والذل .. والحسرة
هَدِدها
هدِدها .. وساومها
يا تجيب له الخلفة قوام
يا يطلق وتلم هدومها
:
لحظة يا تاجر
اما صحيح انك كافر
عالنار
عالنار محدوف محدوف
الدنيا
الدنيا يا تاجر زايلة
إنت أعمى ؟
ما تفتح عينك شوف
انا وانت وهو وهي
عايشين في الدنيا
زوار .. وضيوف
لو دايمة
لو دايمة الدنيا
ما هجرنا امبارح وبكينا عليه
مين ضامن بوكرة يا تاجر
مش يمكن بوكرة هناك
ولا حد ها يشفع ليك
ولا قرش ها تاخده معاك
:
خليها عالله يا تاجر
والرحمة ببنت الناس
ما كفاية قتلت الفرحة
وكسرت القلب الماس
:
انتهى
عامية بقلم
يحيى معوض
الارز

اقتباس:

---

المشاركة الأصلية كتبت بواسطة بركان الغضب

متابعون لك أيها الجميل ...

هل سننتظر طويلا


مودتي

---

البركان الجميل
شكرا لمتابعتك أيها النقي
ويسعدني دائما تواجدك الراقي
اتمنى أن تروق لك تلك العامية
تحياتي

عامية أرزية جميلة ..
"مش بقولوا يا ماخد القرد على مالو راح المال وضل القرد على حالو "
شكرا لك ايها الارز امتعتنا بهذه العامية الجميلة ..
تحياتي

أنا زعلان ْ ..وزعلان كمان ْ
طَبْ ماتقوللي يادكتور كنا بقينا أربعة ..وفيها إيه يعني لما أشوفها ..مايمكن كان نصيبي..صحيح أنا قد أبوها بس
هيى العادة كده مين يدفع أكتر يلاقي واللي مامعوش مالوش..
...............أعذرني على البداية العامية ..علني استطعت التعبير ..
أخي الأرز هو رسم شعبي وجميل أتحفتنا به مثل كل مرة تعود بنا إلى الحارات الشعبية ..
......سلمت يداك ودمت بكل خير
.................................................. ..............أيمن