ياللي ناوي
تكون سياسي
يالي ناوي
تكون سياسي
السياسة
شُغل تاني مختلف
وانت البعيد
شكلك جديد .. عضمَك طري
لازم تكون
لازم تكون آفاق وحاوي
مالكش مِلة ومفتري
:
تحفظ في إمتى
أمتى تماين .. امتى توافق
وبرضه امتى .. تختلف
لازم تكون
لازم تكون في النَتش ديب
تِعبان .. وتعلب .. مُحترف
:
إنت فاكر
السياسي في السياسة
من بطن أُمه جه واخدها بالوراثة
الباشا ده
ده أخدها بالدراع .. وده مُهرب للبتاع
ودي عميلة للرياسة
ودي خبيرة في المياصة
والسياسة السياسة
السياسة تيارات تيارات
البعض منهم اتعلموها في البارات
والبعض منهم
فهمو السياسة
عالصجات وهز وسط الرقصات
والغالبية
في حزب طازة المهلبية
كانو تَقَاوي
واتعلموها في القهاوي
القهوة جامعة
القهوة جامعة منهاجها ايه
في البداية
ازي تصقف والصوت يسَمَع للبوفيه
المعَلم قبل الصبي من صقفِتَك
يترعب ..
قبل الصبي يفز يجري أمرك يا بيه
أدي اول درس ليك
خليك معلم .. قوي ايديك
العيون تكون عليك
ويبقى تاني درس ايه
عَلي صوتَك
اصرخ وايد في الحكومة
بالصوت ها تضمن كرسي ليك
وصلنا فين
وصلنا فين
في القهوة تالت درس ايه
يا واد
يا واد عجوة
هاتي بوري وسطل قهوة
صيغة الأوامر
سيس وسايس
خليك وديع مرة وفتوة
مرة هادي ومرة نادي بكل قوة
سيس وسايس
جاري الزباين .. شِد طاولة
بس حاسب من العتاولة
اختار
اختار زبون طمعان في جيبك
بتنين لمون
يتغلب لك ويبوس في ايدك
هات له سحلب أو ازوزة
ابيجُه .. أربيجُه
خَزِنُه لوقت عوزة
السياسة ليها باب
وعشان تعدي
فيه مقاولة .. وانتخاب
رمز العدالة .. رمز الغزالة
رمز الرزالة .. رمز الكتاب
ها يجي يوم
ها يجي يوم
تحتاج وراك حبة كلاب
لو انت جاهل
لو انت تيس من التيوس
ها ينبحو لك ويهتفو لك بالفلوس
بالذوق .. بالكراسي
بالمطاوي والتروس
ها ينخرولك عرض المنافس
وكله ماشي ... بالفلوس
افرح .. يا عم
ادبح خروف .. اديها عِجل
لو كنت حتى تاجر خضار
ها يصقفولك
لو قلت حتى ريان يا فجل
مـ الخيار
عالكارو او في البرطمان
مـ الكوسة .. من صنف الخضار
جناب سعادتك وصلت بيه البرلمان
في البرلمان ها يحصنوك
يعني تقدر تكبر وتكبر
وتقول لاخوك .. ينعل ابوك
ما هو مـ الخيار
بقيت كبير من الكبار
ومـ الخيار ليك الخيار
تختار مسار
حزب قومي .. حزب نووي
حزب ديني .. حزب وثني
السياسة
العبها صح
وخد طريق الواوا بَح
مبروك ياسيدي
بقيت سياسي حُجة وآراري
بيانات سيادتك
شهادات وعندك
تعليم وعالي
وده كله
أصله مـ القهاوي
:
يحيى معوض
الارز
