بكرة أحلى يا بلدي
وترقص حروف القلم
بين الصوابع
تهتف وتصرخ بحبك يا بلدي
يا أرض الجوامع
يا أرض المصانع
وأرض اللي بزرع
ويضرب بفاسه أرض المحبة
تطرح غناوي
في أرضك يا بلدي
طلعت شموسنا تصبّح
وتحضن في كل المواني
وفجرالليالي ... زقزق وجانا
وشقشق ونوّر ... وقال كلمته
مصر حتبقى رمز الخلود
رمز الكرامة أرض الجدود
مهما اتظلمنا
مهما اتسجنا
مهما اتسحلنا
بنصبر ونصبر
لكن نحذّر...
نفهّم ..
نقول
ولما الحكاية تبقى عصابة .... عصابة جنون
يجي الطوفان
وتطلع خلايق تنور شموسنا ويجي النهار
وتبقى العصابة شوية فيران
وتفضل بلادنا بلاد الامان
وغنوة قلوبنا في كل الزمان
ياناس يا قصايد....
يا كل الشموس
صبرنا .... صرخنا بوجه الطغاة
قالوا علينا شوية عيال
وقالوا سبوهم دي حمقة شباب
وهتوا شويه لأكل الكلاب
كانت عيونا... تدور علينا
وتمشي الخطاوي برغم السلاسل
تشد الشموس تنور بلادي
نفكر في لقمه
نفكرهدمة
وغرفة تلم الولاد
وولد بيكبر والست عايشة لابسه الحداد
وعصابة سيادته تنهب وتاخد
وزلما عيالنا تكبر يا صاحبي
تطفش ... تسافر
فيه اللي يغرق
وفيه اللي يفضل مهاجر
وآه يا بلدنا الحليوة
يا مصر يا أرض المزاهر
عصابة سيادته دي فعلا كانت عصابة
تطبطب تلمع تقمع حضرته
وتقول وتكدب
إن البلدي دي صارت عزبته
قولنا خلاص
الشمس جايه تعري ... تفضح حضرته
وتسكته
قولنا ناخد حقنا ونقول للدنيا
دية مصرنا
دية أرضنا
مش حتفضل عزبته ولا يوم حتبقى حتته
دي مصر الغلابة الشقيانين
والتعبانين
والمعجنونين في تراب شوارعها الحبيبة
واللي سهروا يشوفوا بكره في حضنها
علما وفقها وبنات وطلبة
وحريم شباب رجال وحتى ولادنا الصُغيّره
كل ولادها فيها بحبوا أرضها
بيحبوا نيلها ورملها
والصحرا فيها الخير بطولها وعرضها
والسما ونجومها السهرانين في عشقها
دي مصرنا
عرفانا وسكنا قلوبنا
وهيا نبضها
يا مصر الحبيبة ... بكره أحلى
بكره حلم العمر
يطرح ورد وجناين فل
وشمس بكره حتحلا
علينا لمّا تطل
وتبقى مصر جميلة
وتبقى زي الفل
ونقول دي مصر جنة ربنا
دي مصر حته مننا
دي مصر ست الكل
عوض خاطر
12/7/2011
