شعبولة للي ما يعرفوش
هذه العامية
كتبتها للفنان اللاوزعي شعبولة
رغم انني شاركت بها
في ثرثرة عاشق السمراء
لكن اليت ان اشارك بها هنا
تحية للفنان الجميل
المرحوم يونس شلبي
فقد جمعتني به
الصدفة منذ شهور قبل وفاته
وقد سمع مني الكثير من العامية
وتوقف عند عامية شعبولة
وقال لي رحمه الله .. ابعتها لشعبان ..
شعبان بيحب اللون اللي بيهاجمه ..
استغربت لكن فعلا شعبان شخصية
سنظل عشرين بحث وتحري لتفسيره كظاهرة
شـ
شــ
شـَعبولة
:
إحم إحم وسكوت من فضلكم
الليلة
في نبض المعاني
ها نكتب ونكتب ونحكي ونقولكم
عن بطلنا المغوار شعبان بطل الاغاني
فنان الإيييييييييييييه والآه ه ه .. آه ياني
المرة دي مُطربنا
اللي خَويتنا وِمجننا
لا كبابجي ولا اسطى إيشاني
مكوجي رِجل
مطرب صاعد مطرب واعد
طول عُمرُه كان مِتنيل قاعد
يكوي في هدوم الناس
ويغني ويجعر للبقال والكَنَاس
وليلاتي
مطرب مونولوج وآلاتي
فنان مشهور .. استاذ أفراح وطهور
ما بتفرقش معاه بالصوت يرقع ويهاتي
في صوان بيغني .. فـ الضلمة وفـ النور
شعبان شعبان
وبغنوة جنان
وبقدرة قادر .. من شادر
بقى مطرب شعبي وفنان
صُوتُه
صُوته مغشلق زي الفُل
عامل راسه براس الكُل
ثومة آه يا عيني على ثومة
وفريد وحليم وشكوكو
والحجار وحنان ضاعو في سُوقُه
بيقولو عليه
لون متجدد لون مـ الألوان إيييييييييييييييييييه
ها ابطل السجاير واشرب كينا الحديد
والبس لُكم مشَجر .. وانسيال جديد
واطلع لُكم محشش واغني كتير وابقشش
ايه..................يه
وامزمز في السوداني واقزقز في العزيز
واتسلطن بالغلاسة .. واتحفكم بالسياسة
انا بكره اسرائيل وشارون ده مش لذيذ
وان كنتو ما تعرفوش
ليلاتي احب اغني
وادعي عالأخ بوش
يا رب داهية تاخده .. بلده وكل اهله
وبلير الانجليز .. الواد بتاع بليز
والنغة بتاع سبانيا .. وعمي بتاع باريز
وايـيـيــيه
شايفين
شايفين شعبان يا ناس
بغنوة خدها شُهرة
وكل يوم محاضرة
في دريم .. روتانا سهرة
إيـيـيـيه
ادي الفن يا ناس
شبعان في الفن ستار
مهو عصر الفيديو يا ناس
وكليب لاي حمار
إيـيـيـه
شعبان ساب المكوة
واتنجر بقى حنتوش
ايشي اصفر واخضر واحمر
والشعر طويل منكوش
:
شعبان البصل الأخضر
والفتة والقرقوش
شعبان اتغير خالص
شبعان بقى مروووش
فنان واستار
مِديها
روبيان .. كَفيار ووقار
وده اكلوه وده ما اكلوش
شعبان
بعد الغنوة اياها اتغير خالص خالص
شعبان فَرَح ناس .. وزعل ناس
من أمن الدولة .. بقى مش خالص
الناس إياهم شدوه عزموه
الناس إياهم ايوه إياهم
اللي في بالي واللي في بالكم
أيوه رياسة
قالو هاتو الراجل ده بيغني سياسة
الدنيا اتقلبت ..
اخدوه وسابوه ... والضرب شكلة معلم
شعبان ولا همه .. شعبان ده معلم
اتغير بقى بيغني برتم الهادي
مضطر إن يطاطي .. ويغني بالصوت الواطي
وطي يا بيلية الصوت ما توطي
وهات هات صندوق البيرة
شعبان ها يغني ها يغني في حفلة كبيرة
شعبان عمره ما خاف
لظروف المرة دي ها يغني عالمتغطي
بدل البيرة اديلو لحاف
ها يغني
بعد ما يضرب له حجرين وصاروخ حساس
ويكركر ... ويضبط انفوخ الراس
شعبان راجع تاني
ها يطقطق مووايل ويفرقع باغاني
والاغنية اليوم
كلمات
العجلاتي أحمد شوقي
والأسطى أبو نواس
:
يا قرفان
مـ الفضائيات في سنينا السوخة
شعبولة
من حقه ياخد حقه في الزمن الهوجة
شعبولة
عفريت شاطر ركب الموجة
ما هو رزق الهبل عالمجانين
ونظام يعني
يلا بسرعة خدني في دوكة
إيه ها يضرك
لما يغني واحد جاهل ولا صنايعي ولا عبيط
أهو شعبان فهم الفولة فهم اللعبة وبقى ظيط
اهو شعبان يوم ورا يوم نايم صاحي يعبي شريط
اتعاقد على فيلم روائي
فلم عن امجاده وتاريخه
وحلاوة صوته في محل المكوى
وفـ فن اللف في صواريخه
وادي حياته
حلم حياته إنه يقب
في السينما
والفيديو كليب
:
يحيى معوض
الارز
