السلام عليكم والرحمة
شو حالكم وشو اخباركم عسااااااااااكم طيبين ان شاء الله كلكم
انا المعروف عني اني احب اتعلم من تجارب الناس او حتى تجاربي اللي مريت فيها
حزينة كانت او مفرحة
وكثير منا صارت لهم مواقف او احداث احدثت في مجرى حياته تغير
ممكن يكون هالتغيير كبير او صغير المهم انه تغير
واللي ابيه منكم في هالموضوع انكم تشاركونا بمواقف صارت لكم حزينة او مفرحة ...نعيشها معاكم ونحسها معاكم ونتعلم منها
يعني كل واحد يدخل ويكتب اي موقف وشو التغير اللي صار له من بعدها
واول من بيبتدي هو انا
من حوالي السنة ....سمعت من اخويي انه الله بيرزقه بطفل وهو بيكون اول طفل له بعد انتظار ثلاث سنوات
كل العايلة فرحت واستانست...وكنت طايرة من الوناسة اني بصير عمة ولاول مرة
مرت الشهور وكانت مرته حامل بالشهر السابع وكنا وقتها مسافرين السعودية عسبت نسوي عمرة
وكنا جماعة كبيرة يعني نحن عايلتنا واصدقائنا كنا حوالي 14 شخص من رجال ونساء
المهم سافرنا ورجعنا وكانت الامور تمام التمام
عقبها بايام صار حادث لاخوي ومرته
ااخوي ما صار له شي
بس اللي صار له هو ولده اللي كان الكل ينتظره
توفى الولد في نفس الاسبوع
ولمن جابوه البيت عسبت يغسلونه
كنت احس ان البيت كله ظلام مع انه نحن ما عايشنا الطفل ولا كانت لنا ذكريات وياه بس اللي كنت احسه...انه شو كثر صعب
صعب صعب صعب صعب صعب انه الاب يفقد طفله اللي كان يتمناه من الدنيا
صدج ان اول مرة في حياتي اشوف اخوي يصيح ...منكسر...وحاس بالضياع
لاول مرة اشوف رجل منهزم وجدام عيوني
ساعتها تمنيت هاللحظة ماتطول اكثر
والله لا يكتبها على احد
هالموقف غير فيني كثير
خلاني اتمنى الخير لغيري حتى ولو كان هالشخص عدوي....خلاني أؤمن بالله اكثر واتمسك فيه اكثر.....وانه هذا اللي يبيه
ربي
والحمد لله على كل شي خير كان او شر
وبعد في حديث سمعته بما معناه
انه الطفل الرضيع اللي يتوفاه الله يكون شفيع لوالديه يوم القيامة وطير من طيور الجنة
الله يرحم امواتنا جميعا ان شاء الله
بس الحين الحمد لله بيصير اخوي بوعبادي
والواحد ما يقول غير الحمد لله دوووووووووم
يالله ابي مواقفكم اوووووكيه
